ဟဲ့သား ထမင်းစားတော့၊ မှောင်ပြီနော်
ဟင့်အင်း သား မလေးရှား သွားတော့မယ်အမေ။
ဘာတွေမေးလို့၊ပြောလို့ ဘယ်လိုဖြေသလဲ
လွင့်ချင်သူ၊ လွှင့်ချင်သူ၊ လွတ်ချင်သူ၊ ညွှတ်ချင်သူ၊ ဆွတ်ချင်သူ
ဝိုင်တခွက်နဲ့ မိန့်မိန့်ကြီးကြိုတဲ့ နတ်ပျိုမလေးရဲ့
အပြုံးနက်နက်အောက်မှာ အလင်းဝင်လို့ရပါတယ်။
သေချာတာ ဝိုင်ထဲမှာ KL ညတွေ စီးဝင်လည်ပတ်လို့နေတာ
မသွားတတ်ရင် KOTA RAYA လို့သာပြော
TAXI တိုင်းက ခုချက် ခုစားတဲ့။ ရောက်လိမ့်မယ်။
ဘဝပျောက်ရင်တော့ ဘယ်လိုပြော ဘယ်လိုရှာရမလဲ။
ကိုယ်တိုင်မသိခဲ့တဲ့ KL ည။
ဒို့ပြည်ရဲ့ မြေပုံအပိုင်းအစတွေ အဲဒီမှာ ကပ်ထားတယ်၊
အတိုအစ တွေ့ရင် ကိုယ့်ဘဝအကျိုးအပဲ့နဲ့ရောစပ်ကြည့်
မုန့်ဟင်းခါးစားမယ်၊ မြန်မာလိုပြောမယ်၊
မြန်မာလိုဆိုတဲ့ ဘိုသီချင်းတွေ နားထောင်မယ်၊
ဗမာ့သွေးတံဆိပ် ကွမ်းတထုပ်ဝယ်လို့
KL ည လမ်းတွေပေါ် ပြန်တက်ကမယ်။
မျက်လုံးကို ရဲရဲဖွင့်၊ ဝင်စရာ စပါးမွှေးမရှိဘူး၊
ရှေ့ကို ဝေးဝေးကြည့်၊ ကျွံစရာ ကြမ်းပေါက် မရှိပါဘူး
အလင်းတုနဲ့လမင်း၊ လပြည့်ကြယ်စုံ ကပွဲကို
ပျက်ရယ်ပြုထားတဲ့ KL ည။
ပန်းဆိုးတန်း ကုက္ကိုပင်အောက်မှာထိုင်မယ်၊
မောကြီးပန်းကြီးနဲ့ အကိုရယ် ဒီFLATပေါ်မှာ ရွှေတွေရှိလား။
တခိုင်လုံး ရွှေပါ၊ လှေကားတက်၊
တဆစ်ချိုးတိုင်း တို့ရွှေတံဆိပ် ရဲရဲနီရှိရင်
တက်သာသွား၊ ဦးအောင်ဇေယျရဲ့သား အရက်ပီး တပ်သားတွေ
အလုပ်သမား အခွင့်အရေး ဆွေးနွေးနေတဲ့ KL ည။
ဟိုနား ဒီနား လျှောက်အုံးစို့၊ ဆွဲတယ် ငင်တယ်
နားမလည်ပေမယ့် လွမ်းမှန်းသိတယ်
စင်ပေါ် စင်အောက် ကွာတာပါ
အမ်းစရာမရှိလို့ အကြွေရွေးထည့်နော်
မထည့်ချင်လည်း ထည့်လိုက်ပါ
တို့ရွေးကောက်ပွဲလို ရသပေးတဲ့ KL ည။
ရှေ့မှာ ဘဝတွေ ခဏဝယ်လို့ရတယ်
ဟယ် ရှက်နေပုံများ တံတွေးတောင်နင်လို့
ချင်းနိုင်ငံက လာတယ်ဆိုတဲ့ အကိုကြီးဆိုင်ပေါ်တက်မယ်
ကုန်တိုက်ထဲထိုင်ပြီး လေတဖြူးဖြူးနဲ့ထန်းတောထဲ
ဆလိုင်းကြီး စကားကို အမြည်းလုပ်မယ်
အလွတ်ရရင်တော့ ဆလိုင်းရယ် Good Night !
KL ညထဲ ပြန်ဝင်ပြီ။
အပေါင်ဆုံးညတွေထဲက ရယ်သံလွင်လွင်လေးရယ်
တလက်လက်နဲ့ မျက်လုံးလေးတွေ၊ နှုတ်ခမ်းနီလေးတွေ တဖျပ်ဖျပ်
ဒါ.. တို့ပြည်ပါပဲကွယ်၊ အလင်းထဲ အမှောင်ခြယ်တာနဲ့
အမှောင်ထဲ လမိုက်တာပဲကွာမယ်
တံတားအောက်ဝင် ကုန်ချိန်မယ်၊ ဈေးထွက်မယ်
အရှက် အကြောက် သိက္ခာ ခပ်ကြီးကြီးတွေကို
ဒီနားတင်ချွတ် ဆိတ်သားရေနဲ့ ဖုံးခဲ့မယ်။
သူက ဘဝပေးတယ်၊ ကိုယ်က ဘဝနဲ့ ငွေပေးမယ်
နောက် ... သူက ဒီလိုအပြုံးတွေ ပြန်ပွင့်တဲ့အချိန်
ကိုယ်က နေလောင်မျက်နှာ ဖရိုဖရဲကြီးနဲ့
ဆလိုင်းရဲ့ ထန်းတောထဲက ထွက်
KL ည ပေါ်ပြန်ငြိမယ်။
အဖေါ်မပါပဲလျှောက်၊ ပုခုံးလေးဖက်ပြီးလျှောက်
တိုက်မိတာ ခိုက်မိတာရှိမယ်။ ကြိုက်မိတာလဲ ရှိမယ်။
ဘ၀ အကြွေကို ရှောင်ရင်း လျှောက်ခဲ့ရတဲ့ KL ညတွေ...
တကယ် လွမ်းမိပါရဲ့။ ။
အမည်မသိရှေးစာဆို ကိုပြည့်
Comments
Post a Comment