အောက်ပါအချက်များကိုလိုက်နာခြင်းဖြင့်သင့်ကိုအောင်မြင်သူတယောက်ဖြစ်လာစေမည်။
စောစောအိပ်ယာထခြင်းမှ ရှောင်ကြဉ်ပါ။
စောစောထသော ငှက် အစာဝသည် ဟူသော စကားရှိသည်။ အကယ်၍ သင်က ငှက်မဟုတ်ပဲ အင်းဆက်ပိုးမွှားဆိုလျှင် စောစောထခြင်းကြောင့် အစားခံရဖွယ် ရှိသည်။ ထိုကြောင့် စောစောထ ခြင်းကို ရှောင်ကြဉ်ပါ။
တတ်နိုင်သမျှ တပါးသူကို ခိုင်းပါ။
ကိစ္စ တော်တော်များများ တွင် ကိုယ်တိုင်မလုပ်ပဲ တပါးသူ ဆောင်ရွက်သည်ကို စောင့်ပါ။ ကိစ္စပြီးမြောက်လျှင် သင်က နာမည်ကောင်း ဝင်ယူပါ။ အောင်မြင်မည့်သူ သည် အခွင့်အရေး ကို လက်လွတ်မခံသင့်။
ငါ့စကားနွားရ ပြောပါ။
မှားနေသည့်တိုင် အလျော့မပေးပဲ ငါ့စကား နွားရ ပုံစံဖြင့် ပြောပါ။ထိုသို့ပြောခြင်းဖြင့် တဖက်လူကို ကောင်းစွာ လွှမ်းမိုးနိုင်မည်။
မြက်ပင်ကဲ့သို့နေပါ။
ဆိုလိုသည်မှာ မြက်ပင်သည် လေတိုက်ရာဘက်သို့ယိမ်းသကဲ့သို့ သင်လဲ သာမည့်ဘက်သို့ လိုက်ပါ။ ရှုံးနိုင်မည့်ဘက်တွင် နေခြင်းဖြင့် သင့်အတွက် ရလဒ်ကောင်းများ မရနိုင်ပေ။
ပြစ်တင် ကဲ့ရဲ့ခြင်းများကို ချက်ချင်းတုန့်ပြန်ပါ။
တစုံတယောက် က သင့်ကို ပြစ်တင်ပြောဆိုလာပါက ချက်ချင်းတုန့်ပြန်ခြင်းအားဖြင့် နောက်တကြိမ် ပြစ်တင်ခံခြင်းမှ ရှောင်နိုင်မည်ဖြစ်သည်။ လိုအပ်လျှင် ငါးစိမ်းသည်ကဲ့သို့ ကတ်ကတ်လန် ရန်တွေ့နိုင်လျှင် ပို ကောင်း၏။ သင်၏ နှုတ်စ လျှာစ ကို အလွယ်တကူ ထုတ်ဖေါ်ပြသနိုင်မည့် အခွင့်အရေးပင်ဖြစ်သည်။
မှတ်ချက်။ ။အထက်ပါ အချက်များကို ကမ္ဘာကျော် စာရေးဆရာကြီး Sir J.N Ngapyin ၏ A Successful Life စာအုပ်မှ ကောက်နှုတ်၍ ငပျင်းလေးက ဝေမျှပါသည်။
Comments
Post a Comment